လမ်းကြားသရဲ

လွန်ခဲ့တဲ့(၁၅)နှစ်လောက်က အရှေ့တောင်အာရှရဲ့ အတိုးတက်ဆုံးနိုင်ငံတစ်ခုရဲ့ မြို့အစွန်အဖျားနားမှာ တရားမ၀င်နေထိုင်ပြီး တရုတ်သင်္ချိုင်းကုန်းမှာ အလုပ်လုပ်ကြတဲ့ မြန်မာနိုင်ငံမှ တိုင်းရင်းသား/အလုပ်သမား အုပ်စုတစ်စု ရှိခဲ့ဖူးပါတယ်။သူတို့က တရုတ်သင်္ချိုင်းရှိအုတ်ဂူတွေ ဆေးသုတ်တာတို့ ၊ မြက်ခင်းတွေပြုပြင်တာ တို့ ၊ပန်းပင်တွေ အလှအပမွမ်းမံတာတို့ လုပ်ရပါတယ်။

တနေ့ကျတော့ အလုပ်သမားတစ်ယောက်က သင်္ချိုင်းရှိအုတ်ဂူတစ်ခုရဲ့ အပေါ်မှာ ကလေးကစားစရာပစ္စည်း ခပ်ကြီးကြီးတစ်ခုကိုတွေ့ရလို့ အခန်းကို သယ်သွားပါတယ်။ နောက် သုံး… လေးရက် ကြာတော့ အုတ်ဂူနဲ့ ပက်သက်တဲ့ ကျန်ရစ်သူ တရုတ်မိသားစု ရောက်လာပြီး ကွယ်လွန်သွားတဲ့ သူတို့သားလေး အုတ်ဂူပေါ်မှာ အမှတ်တရ တင်ထားတဲ့ ကစားစရာ မော်တော်ကားလေး ပျောက်သွားကြောင်း တရုတ်သင်္ချိုင်း ပြုပြင်ရေး ကန်ထရိုက်ဆွဲထားတဲ့ တရုတ်သူဋ္ဌေးကို တိုင်ကြားပါတော့တယ်။ ဒါနဲ့ တရုတ်သူဋ္ဌေးလည်း ဒေါပွပြီး မြန်မာ အလုပ်သမား အားလုံးကို နှစ်ပတ်တိတိ အလုပ်မဆင်းဖို့ အပြစ်ပေးပါတော့တယ်။

နှစ်ပတ်တိတိ အလုပ်ပြုတ်နေတဲ့ အလုပ်သမားတွေလည်း အလုပ်ပြန် မဆင်းရခင်စပ်ကြား သူတို့နေထိုင်ရာ အခန်းထဲမှာ နေ့တိုင်းလိုလို သောက်ပွဲစားပွဲလေးတွေ လုပ်ပြီး နေခဲ့ကြပါတယ်။ အခန်းရဲ့ပြင်ပ ဆိုလို့တိုက် နံဘေးက စတိုးဆိုင်လောက်ပဲ သူတို့သွားရဲပါတယ်။ သူတို့ အားလုံးက အဲဒီနိုင်ငံမှာ တရားမ၀င် နေထိုင်ပြီး အလုပ်လုပ်စားနေရတဲ့ ဘ၀တွေပါ။

အခန်းတံခါးပိတ်ပြီး အခန်းထဲမှာ အရက်စုသောက်ကြတဲ့ အလုပ်သမားတွေထဲမှာ အရက်နည်းနည်းလောက် သောက်ပြီးရင် သွေးဆူတတ်တဲ့ အလုပ်သမား တစ်ယောက်ရှိပါတယ်။ အဲဒီသူက အလုပ်သမားတွေအားလုံး

နှစ်ပတ်တိတိ အလုပ်ပြုတ်ရတဲ့ တရားခံအလုပ်သမားပါ။ တရုတ်သင်္ချိုင်း ကလေးအုတ်ဂူပေါ်က ကစားစရာ မော်တော်ကားလေးကို ယူလာတာလည်း သူပါပဲ။ အလုပ်ခဏ ပြုတ်လို့ အရက်သောက်လိုက် တီဗွီကြည့်

လိုက်လုပ်နေကြတဲ့ ညတစ်ညမှာ ကလေးကစားစရာကို သင်္ချိုင်းကယူလာတဲ့ အလုပ်သမား အရက်သောက် ပြီး အရက်ဝိုင်းနံဘေးမှာ အိပ်ပျော်သွားပါတယ်။ အရက်သောက်နေကြတဲ့ အလုပ်သမားတွေဟာလဲ အရက် သောက်နေရင်း စကားသံကို ကျယ်ကျယ်မပြောရဲပါဘူး။ နံဘေးအခန်းတွေကသူတို့ရဲ့ ဆူညံမှုကို ရဲစခန်းဆီ ဖုန်းဆက်တိုင်ကြားရင် သူတို့အားလုံးတရားမ၀င် အလုပ်သမားဖြစ်နေတာကို ရဲက သိသွားမှာ စိုးလို့ပါ။

ဒီလိုနဲ့ နည်းနည်း ညဥ့်နက်လာချိန်မှာ အရက်ဝိုင်းနံဘေး အိပ်ပျော်နေတဲ့ အလုပ်သမားက နိုးလာပါတယ်။ ပြီးတော့ အိပ်ချင်မူးတူးနဲ့ အရက်တွေကို တစ်ခွက်ပြီး တစ်ခွက် ယူသောက်ပါတယ်။ ထို့နောက် အရက်ဝိုင်း

ထဲက အခြားအလုပ်သမားတွေကို စကားသံ ဗလုံဗထွေးနဲ့ ယစ်ပါတော့တယ်။ အဲဒါနဲ့လည်း မပြီးသေးပါဘူး၊ အိပ်ခန်းထဲက အိပ်ပျော်နေတဲ့သူတွေကို ဇွတ်အတင်းနှိုးပြီး ရစ်ပါသေးတယ်။ ပထမတော့ အားလုံးကသူ့ကို မူးပြီး မရစ်ဖို့ ၀ိုင်းပြီး တောင်းပန်ကြပါတယ်။ ဘယ်လိုလိုပြောပြောပြောလို့ မရခဲ့ပါဘူး။ အမူးလွန်နေတဲ့ သူက နောက်ဆုံးမှာ နောက်ဖေး မီးဖိုချောင်ထဲက အသားလှီး ဓါးကို ယူပြီး အားလုံးကို ခုတ်မယ် ထစ်မယ်

တကဲကဲ လုပ်ပါတော့တယ်။ အသံတွေဟာ တစထက်တစ ပိုဆူညံလာပြီး ထိမ်းမရအောင် ဖြစ်လာပါတယ်။ ဒီလိုနဲ့ နောက်ဆုံးမှာ အဲဒီအခန်းထဲက အလုပ်သမားအားလုံး ဆုံးဖြတ်ချက်တစ်ခုကို ချမှတ်လိုက်ပါတယ်။

မူးပြီး ရစ်နေတဲ့ အလုပ်သမားကို သတ်ပြစ်လိုက်ပါတယ်။ သေသူရဲ့ခန္ဓာကိုယ်ကို အပိုင်းပိုင်းဖြစ်အောင် ခုတ် ကြပါတယ်။ အဲဒီလို အပိုင်းပိုင်းဖြစ်အောင် ခုတ်ထစ်တဲ့ နေရာမှာ အခန်းရဲ့ ကြမ်းပြင်ပေါ်မှာ တင်ပြီးခုတ်ရင် ဓါးမ’ကြောင့် ခုတ်သံတွေ ထွက်ပေါ်လာလို့ အောက်ခန်းက လူတွေသိသွားမှာကို သူတို့ စိုးရိမ်းကြပါတယ်။ ဒါကြောင့် လူသေအလောင်းကိုဟိုဖက်တစ်ယောက် ဒီဖက်တစ်ယောက် အမြင့်မှာ မြှောက်ပြီး ခုတ်ထစ်

ကြပါတယ်။ အဲဒီနောက် ခန္ဓာကိုယ် အစိတ်အပိုင်းတွေကို အမှိုက်ပြစ်ရာ အသုံးပြုတဲ့ အိတ်အမဲရောင်တွေနဲ့ နှစ်ထပ်သုံးထပ် သေသေချာချာ ထုတ်ပိုးပါတယ်။ မနက်မိုးမလင်းခင် ဝေလီဝေလင်းမှာ လူသေအစိတ်အပိုင်း များထည့်ထားတဲ့ အိတ်အမဲတွေကို သူတို့ နေထိုင်ရာ တိုက်အမြင့်ကြီး၏ အမှိုက်ပစ်ရာတွင် အသုံးပြုသော ဂလိုင်ပေါက်မှတဆင့် ပစ်ချ ခဲ့ကြပါတယ်။

(*ဂလိုင်ပေါက်= ကန်ထရိုက်တိုက်အပေါ်ထပ်တွင် နေထိုင်သူများ အနေဖြင့် အမှိုက်ထုပ်များကို စွန့်ပစ်ရာ တွင် တိုက်အောက်ခြေသို့ဆင်းစရာ မလိုပဲ အလွှာတိုင်းတွင် ရှိသော အမှိုက်ပစ်နိုင်သည့် အပေါက်တစ်ခု။)

အသတ်ခံရတဲ့ အလုပ်သမား မိသားစုဟာ မြန်မာနိုင်ငံအောက်ပိုင်းက ကျေးရွာလေးတစ်ခုကပါ။ ဇနီးသည်နဲ့ သားသမီးငယ်သုံးဦး တို့ဟာ အဲဒီသတင်းကို ချက်ချင်း မသိရှိခဲ့ကြပါဘူး။ သေဆုံးသွားသူရဲ့ ကလေးငယ်များ ဟာ ညစဉ်လိုလို အိမ်မက်ဆိုးတွေ မက်ခဲ့ကြပါတယ်။ သူတို့ရဲ့ ဖခင်ဖြစ်သူဟာ ကစားစရာ မော်တော်ကား လေးတစ်ခုကို လက်တစ်ဖက်မှာ ကိုင်ဆောင်ထားပြီး အခြားလက်တစ်ဖက်မှာလည်း အသားဖြူဖြူ တရုတ် ကလေးငယ်တစ်ဦး လက်ဆွဲပြီး သူတို့အိမ် အပေါက်ဝမှာ မျက်နှာငယ်ငယ်နဲ့ ရောက်လာတယ်လို့ အိမ်မက် မက်ကြပါတယ်။အသတ်ခံရသူဟာ နှစ်လ တစ်ကြိမ် အိမ်ကို ပိုက်ဆံပို့တဲ့ အခါတိုင်း သူ့မိသားစုထံဖုန်းဆက် လေ့ ရှိပါတယ်။ကျန်ရစ်သူမိသားစုလည်း လကုန်ရင် ဖုန်းဆက်မလားလို့ စောင့်မျှော်နေခဲ့ကြပါတယ်။

လူသတ်မှုကိုကျူးလွန်ခဲ့တဲ့ အလုပ်သမားတွေလည်း အဲဒီကိစ္စကို ညီညွတ်စွာနဲ့ တိုးတိုးတိတ်တိတ်ပဲ နေခဲ့ကြ ပါတယ်။ ဒီလိုနဲ့ လူသတ်မှုဖြစ်ပွားပြီး နှစ်ပတ် သုံးပတ်လောက် ကြာတော့ သူတို့ ဌားရမ်းနေထိုင်ရာ အဲဒီ့ အဆောက်အဦးမှာ သတင်းတွေ ထွက်ပေါ်လာပါတယ်။ တိုက်တစ်ခုလုံးမှာ နေထိုင်သူ အများစုက ဒေသခံ တရုတ်လူမျိုးတွေ ဖြစ်ပါတယ်။ ညဖက် အမှိုက်ထုပ်သွားပစ်သူတွေကို သရဲခြောက်ခံရတဲ့ သတင်းတွေကလဲ

တဖြေးဖြေးချင်း လူပြောများလာပါတယ်။

လူသတ်မှုကို ကျူးလွန်ခဲ့တဲ့ အလုပ်သမားတွေထဲမှာ အသတ်ခံရတဲ့ အလုပ်သမားနဲ့ တရွာတည်း အတူတူ အလုပ်လာလုပ်သော အလုပ်သမား တစ်ယောက်ရှိပါတယ်။ ထိုသူလည်း ညစဉ် အိမ်မက်ဆိုးတွေ မက်ခဲ့ပါ တယ်။ ညစဉ် အိမ်မက်ထဲမှာ အသတ်ခံရတဲ့ အလုပ်သမားက သူ့အတွက် ဘာသာရေးဆိုင်ရာ အမျှအတန်း ပေးဝေဖို့ လာပြောတယ်လို့ဆိုပါတယ်။ ပြီးတော့ကျန်ရစ်ခဲ့တဲ့ သူ့ပစ္စည်းတွေနဲ့ ပိုက်ဆံအချို့ကိုသူ့မိသားစု ထံပို့ပေးဖို့လည်း အိမ်မက်ထဲမှာ လာလာပြောတယ်လို့ ဆိုပါတယ်။ ဒါနဲ့ ကျန်တဲ့ အလုပ်သမားတွေလည်း သူတို့သတ်လိုက်တဲ့ အလုပ်သမားမိသားစုကို သနားပြီး ကျန်ရစ်ခဲ့တဲ့သူ့မိသားစုထံနှစ်လ တစ်ကြိမ် စုပေါင်း ပြီး ပိုက်ဆံ ပို့ဖို့ ဆုံးဖြတ်ခဲ့ကြပါတယ်။

ရုပ်အလောင်းကို တစ်စစီ ခုတ်ထစ်ပြီး လွှတ်ပြစ်ခဲ့တဲ့ အမှိုက်ပစ်ရာ လမ်းကြားက သူတို့နေထိုင်ရာ အလွှာမှာ နှစ်ဖက်ရှိပါတယ်။တိုက်ရဲ့ဘေးအစွန်းနှစ်ဖက်မှာ အပေါ်ထပ်ကိုတက်ရောက်နိုင်တဲ့ လှေကားတွေ ရှိပါတယ်။ အမှိုက်ပစ်တဲ့ လမ်းကြားဟာ လှေကားနဲ့ ကပ်လျှက်မှာ ရှိပါတယ်။ သူတို့နေထိုင်ရာ အလွှာက နေထိုင်သူတွေ ညဖက်ဆိုရင် ဘယ်သူမျှ အမှိုက် သွားမပစ်ရဲပါဘူး။ အဲဒီလှေကားနံဘေးကို ညဖက်တွေမှာ ဘယ်သူမျှ မသွားရဲပါဘူး၊ အခြားအစွန်း တစ်ဖက်မှာရှိတဲ့ လှေကားနဲ့ အမှိုက်ပစ်တဲ့ လမ်းကြားကိုပဲ အသုံးပြုကြပါတယ်။ အဲဒီလမ်းကြားနဲ့ ကပ်လျှက် အခန်းက လူတွေကတော့ ညဖက်တွေမှာ လမ်းလျှောက်သံတွေ ကြားရတယ်၊ လူတစ်ယောက်ဒေါသထွက်ပြီး “တောက်” ခေါက်လိုက်တဲ့ အသံ၊ ၀မ်းနည်းစွာနဲ့ ရှိုက်ကြီးတငင်ငင် ငိုကြွေး သံတွေ ကြားရတယ်လို့ ဆိုပါတယ်။

တိုက်မှာနေထိုင်တဲ့ တရုတ်မိသားစုတွေက သရဲခြောက်တယ်လို့ နာမည်ထွက်လာတဲ့ အမှိုက်သွားပစ်ရာ လမ်းကြားကို ပထမတော့စာရွက်တွေ သွားကပ်ပါတယ်။ အဲဒီစာရွက်တွေက တရုတ်ဘုံကျောင်းတွေမှာပေး ဝေတဲ့ ဘာသာရေးစာ ရေးသားထားတဲ့ စာရွက်တွေပါ။ ဒါပေမဲ့လည်းသရဲခြောက်တဲ့ ပြဿနာတွေကတော့ ပြေလည်မသွားပါ ဘူး။ လူသတ်မှုကို ကျူးလွန်ခဲ့တဲ့ အလုပ်သမားတွေလည်း နောက် လေး …ငါးလအကြာ လောက်မှာ အဲဒီတိုက်ကနေ အခြားတစ်နေရာကို ပြောင်းရွှေ့သွားပါတယ်။ သူတို့ လူသတ်မှုဖြစ်ပွားပြီး တစ်နှစ်ကျော်ကျော် အကြာမှာ အသတ်ခံရသူရဲ့ မိသားစုထံကို လုပ်ငန်းခွင်မှာ မတော်တဆဖြစ်ပြီးကွယ်လွန် သွားကြောင်း အကြောင်းကြားခဲ့ပါတယ်။ မြန်မာပြည်က မိသားစုလည်း ဘုမသိဘမသိနဲ့ သူများပြောတာကို ယုံပြီးလက်ခံလိုက်ရပါတယ်။ ရေခြားမြေခြားမှာ တရားမ၀င်နေထိုင်ပြီး အလုပ်လုပ်နေရတဲ့အလုပ်သမားတစ် ယောက်ရဲ့ သေဆုံးမှုမှာအလောင်းကို ပြန်သယ်ဆောင်ဖို့ဆိုတာ ခက်ခဲမှာပဲလို့ ကျန်ရစ်သူ မိသားစုကမှတ် ယူခဲ့ပါတယ်။

သရဲခြောက်တဲ့ဇာတ်လမ်းက မပြီးဆုံးခဲ့ပါ။ သရဲခြောက်တယ်လို့နာမည်းကြီးနေတဲ့ အဲဒီတိုက်ကြီးကို နောက် နှစ်အနည်းငယ် ကြာတော့တရားဝင်နေထိုင်ပြီး အလုပ် လုပ်ကိုင်ဖို့ မြန်မာပြည်က မိသားစုတစ်စုပြောင်းရွေ့ လာပါတယ်။

တိုက်တိုက်ဆိုင်ဆိုင်ဆိုသလိုပဲ မြန်မာပြည်က ပြောင်းရွှေ့လာတဲ့မိသားစုဟာ ယခင်ကလူသတ်မှုဖြစ်ပွားခဲ့တဲ့ အခန်းနံဘေးက အခန်းမှာ နေထိုင်ကြပါတယ်။ သူတို့မိသားစုမှာ ဆရာဝန် လင်မယား၊ သားသမီး သုံးဦး၊ အဖွားဖြစ်သူတို့ ပါရှိတဲ့ လူခြောက်ဦးပါ။ သူတို့ပြောင်းရွှေ့လာပြီးလပိုင်းအတွင်း သူတို့အလွှာမှာ နေထိုင်တဲ့ တရုတ်မိသားစုတွေနဲ့ခင်မင်ရင်းနှီးလာပါတယ်။ တရုတ်မိသားစုတွေဆီကနေ အမှိုက်ပစ်တဲ့ လမ်းကြားမှာ ညဖက်ဆိုရင် သရဲခြောက်တယ်ဆိုတဲ့ သတင်းစကားကို သူတို့ ကြားသိခဲ့ပါတယ်။

သူတို့ ကြားခါစက မယုံတ၀က် ယုံတ၀က်ပါ။ ခင်ပွန်းဖြစ်သူ ဆရာဝန်က သရဲတစ္ဆေကို လုံးဝမယုံကြည်သူပါ။ တနေ့တော့ အဲဒီတိုင်းပြည်မှာလာရောက် အလုပ်လုပ်နေတဲ့ ငယ်သူငယ်ချင်းတွေကို သူတို့အခန်းမှာညစာ ခေါ်ကျွေးပါတယ်။ ညစာစားရင်း အရက်သောက်ဖြစ်ကြပါတယ်။ည(၁)နာရီ ပတ်ဝန်းကျင်လောက်မှာအရက် ၀ိုင်း သိမ်းပါတော့တယ်။အိမ်ပြန်ကြမယ့် သူငယ်ချင်းတွေကို အိမ်ရှင် ဆရာဝန်နဲ့ နောက်တနေ့မနက်ကျမှ အိမ်ကိုပြန်မယ့် ငယ်သူချင်းတစ်ဦးတို့က ကားဂိတ်အထိ လိုက်ပို့ကြပါတယ်။

ဒီလိုနဲ့ ငယ်သူငယ်ချင်းတွေကို TAXI ပေါ်တင်ပြီး တိုက်ပေါ်ကို ပြန်တက်လာခဲ့ပါတယ်။ နှစ်ယောက်စလုံး အနည်းငယ် မူးနေတာကြောင့် သူတို့အခန်းရှိရာနဲ့ နီးကပ်တဲ့ လှေကားကနေပဲ အပေါ်ထပ်ကို တက်လာ ခဲ့ပါတယ်။ လှေကားအပေါ်ကို တက်ခါစမှာ အပေါ်က စကားပြောနေသံလိုလို သူတို့ ကြားနေရပါတယ်။ သူတို့စိတ်ထဲမှာ သူတို့ နှစ်ဦးစလုံးမူးနေလို့ အိမ်ရှင်ဆရာဝန်မိသားစု အခန်းတံခါး အပြင်ထွက်ပြီး စောင့် နေတာ ဖြစ်မယ်လို့ထင်နေပါတယ်။

လှေကားကနေ သူတို့အလွှာထဲ ချိုးအကွေ့မှာရုတ်တရက် နှစ်ဦးစလုံး ကြက်သီးတွေ ထ'သွားပါတယ်။ မူးနေ တာတွေလည်း ပြေသလိုခံစားလိုက်ရပါတယ်။ သူတို့ခုနက ကြားနေရတဲ့အသံကို သတိသွားရလိုက်ပါတယ်။ အဲဒါနဲ့ပဲ နံဘေးပတ်ပတ်လည်ကို လျှောက်ကြည့်လိုက်တော့ အမှိုက်သွားပစ်နေကြ လမ်းကြားထဲမှာ လူတစ် ယောက်က ကျောပေးပြီး အမှိုက်ပစ်တဲ့ အပေါက်ဝအပေါ်က နံရံကို လက်နှစ်ဖက်မြှောက်တွန်းလို့ ခပ်ကုန်း ကုန်း ရပ်နေပါတယ်။အဲဒီလူရဲ့ နောက်ဖက်မှာ ကလေးငယ်တစ်ဦးက ငိုနေပြီး ကျောပေးရပ်နေသူရဲ့ တင်ပါး ကို တဖြန်းဖြန်းနဲ့ ရိုက်နေပါတယ်။ကလေးရဲ့ပုံစံက အဲဒီလူဆီကနေ တစ်ခုခုကို အတင်းတောင်းနေတဲ့ပုံပါ..။ သူတို့ရပ်လိုက်တဲ့ ခဏလေးအတွင်းမှာပဲ ကလေးငယ်ဟာ သူတို့ဖက်ကိုလှည့်ကြည့်လာပါတယ်။ကလေးရဲ့ မျက်လုံးနှစ်ဖက်ဟာ တော်တော်လေး ငိုထားတဲ့ပုံစံမျိုးပါ။ မျက်လုံးတွေ ရဲရဲတောက်လို့။

ကလေးက သူတို့ကို မြင်မြင်ချင်း အံ့အားသင့်သလို ဖြစ်သွားပြီး စိုက်ကြည့်နေပါတယ်။ ငိုနေတဲ့ ကလေးငယ် ကို ဆရာဝန်ဖြစ်သူကတချက်ပြုံးပြပြီး သူတို့အခန်းဖက်ဆီထွက်ခဲ့ပါတယ်။ခြေလှမ်း လေး….ငါး လှမ်းလောက် လှမ်းပြီးချိန်မှာ သူတို့ နောက်ကျောဖက်ကနေ အသံတစ်ခုကြားလိုက်ရပါတယ်။ “ညီလေးတို့” ဆိုတဲ့အသံကို သူတို့နှစ်ဦး သေသေချာချာ သဲသဲကွဲကွဲကြားလိုက်ရတာပါ။ဒါနဲ့ နောက်ကို ပြန်လှည့်ကြည့်တော့ နောက်မှာ ဘယ်သူကိုမျှ မတွေ့ရပါ။ သူတို့စိတ်ထဲ ဇဝေဇ၀ါ ဖြစ်ဖြစ်နဲ့ အခန်းဆီ ဆက်မသွားသေးပဲ အခုလေးတင် ကျော်ဖြတ်ခဲ့တဲ့ အမှိုက်ပစ်တဲ့ လမ်းကြားဆီကို နှစ်ယောက်သား ပြန်သွားကြည့်ပါတယ်။ လမ်းကြားထိပ်ကို ရောက်တော့ လမ်းကြားထဲမှာ ဘယ်သူကိုမျှ မတွေ့ရတာကြောင့်အရမ်း အံ့သြသွားပါတယ်။ ခုနကကျောပေး ရပ်နေသူနဲ့ ကလေးငယ်တို့၊ဒီလမ်းလေးထဲကနေ စက္ကန့်ပိုင်းလောက်သာရှိတဲ့ အချိန်အတွင်းမှာ ဒီလောက် လျင်လျင်မြန်မြန်ကြီး ပျောက်ကွယ်သွားဖို့ဆိုတာ လုံးဝမဖြစ်နိုင်ပါဘူးလို့ အဓိပ္ပါယ်ရတဲ့ မျက်လုံးတွေနဲ့ တစ်ဦး နဲ့တစ်ဦးကြည့်မိလိုက်ပါတယ်။အဲဒီအချိန်အထိ သူတို့နှစ်ဦးစလုံး သရဲခြောက် ခံနေရတယ်လို့သူတို့ ကိုယ်သူတို့ မထင်သေးပါဘူး။

သူတို့နေထိုင်ရာ အခန်းရှေ့ရှိ ပထမ သံတခါးမှာ ခတ်ထားတဲ့ သော့ခလောက်ကို ဖွင့်ရင်း အထဲကို အ၀င်မှာ သော့ခလောက်အိမ်က ကြမ်းပြင်ပေါ် ပြုတ်ကျသွားပါတယ်။ အိမ်ရှင်ဆရာဝန်ဖြစ်သူက ပြုတ်ကျသွားတဲ့

သော့ခလောက်အိမ်ကို ကုန်းကောက်လိုက်ချိန်မှာ နံဘေးက ဧည့်သည် သူငယ်ချင်းဖြစ်သူက …

“ဟိုနား ပုန်းနကွယ်ကနေ လူနှစ်ယောက် ခေါင်းလေးတွေထွက်ပြီး ပြူတစ်ပြူတစ်နဲ့ ငါတို့ကို ကြည့်နေတယ် ကွ …” လို့ ပြောပါတယ်။ အိမ်ရှင်ဆရာဝန်က လှမ်းကြည့်တော့ ဘာမျှ မတွေ့ရပါဘူး။ သော့ခလောက်ပြုတ် ကျသံ၊ သံတခါး ဖွင့်သံတွေကြောင့် အိမ်ထဲကမိသားစုလည်း အတွင်း သစ်သားတံခါးကို ဖွင့်လာပါတယ်။ ဧည့်သည်ဖြစ်သူက အိမ်ထဲက ထွက်လာတဲ့ မိသားစုကို ဒီတိုက်မှာ အခြားမြန်မာ အလုပ်သမားတွေ စုပေါင်း နေထိုင်တဲ့ အခန်းများ ရှိသလားလို့ မေးမြန်းစပ်စုရင်း အခန်းထဲကို ၀င်ခဲ့ကြပါတယ်။

ဆရာဝန်မိသားစုက ဧည့်သည် သူငယ်ချင်းဖြစ်သူကို သူတို့အလွှာရဲ့ အမှိုက်ပစ်တဲ့ လမ်းကြားမှာ ညဖက် သရဲခြောက်ကြောင်း ရှင်းပြကြပါတယ်။ နံဘေးခန်းက လူတွေဆိုရင် ညဖက်မှာ အဲဒီနေရာဆီ အမှိုက်သွား မပစ်ရဲသလို တတိုက်လုံးမှာ နေတဲ့ လူတွေလည်း အဲဒီဖက် လှေကားကို ညဖက်မှာ အတက်အဆင်း မလုပ်ရဲ ကြကြောင်း ပြောပြပါတယ်။ဧည့်သည် သူငယ်ချင်းက သူအလုပ်လုပ်နေတဲ့ စက်ရုံမှာသရဲတစ္ဆေခြောက်တယ် လို့နာမည်ကြီးတဲ့ နေရာတွေမှာ စပ်စုစမ်းသပ်ချင်တဲ့ လူငယ်အလုပ်သမားများ ရှိကြောင်း၊ ခွင့်ပြုမယ်ဆိုရင် သူတို့ကိုခေါ်ဆောင်ပြီး အလည်လာချင်ကြောင်း ပြောပါတယ်။ အိမ်ရှင်မိသားစုက အရမ်းဆူဆူညံညံ မဖြစ် ဘူးဆိုရင်တော့ အလည်လာခဲ့ဖို့ ဖိတ်ကြားလိုက်ပါတယ်။

အဲဒီည တစ်ညလုံး အိမ်ရှင်ဖြစ်သူ ဆရာဝန်ဟာ အိမ်မက်ဆိုးတွေမက်ပြီး အိပ်ယာက လန့်လန့်နိုးပါတယ်။ အိမ်မက်ထဲမှာ သူတခါမျှ မတွေ့ဖူးတဲ့ လူတစ်ယောက်က သူ့ကို သင်္ချိုင်းကုန်းတစ်ခုသို့ ခေါ်ဆောင်သွားပါ တယ်၊ ပြီးတော့ အုတ်ဂူတစ်ခုကို လက်ညှိုးထိုးပြပြီး ကလေးကစားစရာ မော်တော်ကားတစ်ခု ရှာဖွေပြီး လာ ထားပေးဖို့နဲ့ ဖုန်းနံပါတ်တစ်ခုကို ရွတ်ပြပြီး သူ့သားသမီးတွေကိုအကူအညီပေးဖို့လည်း ငိုပြီး ပြောပါတယ်။ အဲဒီအိမ်မက်အကြောင်း ဆရာဝန်က ကျန်တဲ့သူတွေကို ပြောပြပါတယ်။

မနက်မိုးလင်းတော့ အိမ်ကိုပြန်မယ့် ဧည့်သည်ဖြစ်သူငယ်သူငယ်ချင်းကို ညက အိမ်မက်အကြောင်း ပြောပြ ပါတယ်။ သူငယ်ချင်းဖြစ်သူက …“ဒါ မင်းကို ချဲထိုးဖို့ နံပါတ် ပေးတာနဲ့တူတယ်၊ အိမ်မက်ထဲမှာ သူပြောသွား တဲ့ တယ်လီဖုန်းနံပါတ်ရဲ့ နောက်ဆုံးဂဏန်း လေးလုံးကို ဒီတိုင်းပြည်က လေးလုံးထီမှာ သွားထိုးကြည့်ပါလား …”လို့ ရယ်မောစရာ ပြောပါတယ်။ တခါမျှ ထီမထိုးဖူးတဲ့ ဆရာဝန်လည်း ထီဆိုင်မှာ သွားပြီး လေးလုံးထီကို အရှေ့ ငါးကျပ်၊ အနောက် ငါးကျပ်ဖိုး ထီထိုးပါတော့တယ်။

နောက်တနေ့ ညနေမှာ သူငယ်ချင်းဖြစ်သူနဲ့ လူငယ်လေးယောက်တို့သူတို့အခန်းကို အလည်ရောက်လာ ကြပါတယ်။ အလည်လာသူများက သရဲခြောက်တဲ့ကိစ္စကို လက်တွေ့စမ်းသပ်ကြည့်ချင်ကြောင်း ပြောကြပါ တယ်။ ဘယ်လိုစမ်းသပ်မှာလဲလို့ မေးကြည့်တော့ လူငယ်များက သူတို့မှာ နည်းလမ်း (၂)ခုရှိကြောင်း၊ ပထမနည်းက သရဲခြောက်တဲ့နေရာဆီ သစ်သားခုံ တစ်ခု သယ်သွားမယ် … ပြီးတော့ အဲဒီသစ်သားခုံပေါ်မှာ လက်ဖ၀ါးတွေကို မှောက်ခုံအနေအထားနဲ့ ကားပြီးဖြန့်ထားရမယ် … လက်မချင်း ထိထားရမယ် .... လူတိုင်း အဲဒီပုံစံလုပ်ရမယ် … တစ်ဦးနဲ့တစ်ဦး လက်သန်းချင်းထိထားရမယ်… ခုံအလယ်မှာ အသားစိမ်းတစ် ခုကို ခွက်တစ်ခုနဲ့ လုံအောင်အုပ်ပြီးအဲဒီအပေါ်မှာ ဖယောင်းတိုင် ထွန်းထားရမယ် … နံဘေးမှာ ရပ်ကြည့်နေ သူ မရှိရဘူး … သရဲခေါ်တဲ့လူကလွဲရင် အစီအစဉ် စတဲ့အချိန်ကနေ ပြန်ထွက်ဖို့ ပြောတဲ့အထိ ဘယ်သူမျှ စကား မပြောရဘူး… လို့ ဆိုပါတယ်။

ဒုတိယနည်းကတော့ “ခေါစာ”ပြစ်ပြီး “ပြာ” ခင်းတဲ့ နည်းလို့ ဆိုပါတယ်။ ဖိနပ်ကို ဘယ်ညာပြောင်းစီးရမယ် အင်္ကျီကို ပြောင်းပြန်ဝတ်သွားရမယ် … “ခေါစာ” သွားပြစ်မယ့် လူက “လိပ်ပြာ” ရင့်တဲ့သူ(လုံးဝအကြောက် အလန့်မရှိသူ) … လက်ပြန်အနေအထားနဲ့ ခေါစာကျွေးမဲ့ လင်ဗန်းကို ချရမယ် … လင်ဗန်းရဲ့နံဘေးပတ် ပတ်လည်မှာ “ပြာ”မှုန့်တွေ ခင်းရမယ် … ဟင်းအိုးအုပ်တဲ့ စလောင်းဖုံး တစ်ခုခုနဲ့အသံထွက်အောင် တီးပြီး လာစားဖို့ဖိတ်ရမယ် … ခေါစာ ပစ်ထားတဲ့နံဘေးကို ဘယ်သူမျှ မသွားရဘူး … နှစ်နာရီလောက်နေရင် လာ မလာဆိုတာ “ခြေရာ”တွေကို ပြာတွေပေါ်မှာ သွားကြည့်လို့ ရကြောင်း ပြောပြကြပါတယ်။

ဒီလိုနဲ့ အိမ်ရှင် ဆရာဝန် အပါအ၀င် လူခြောက်ယောက်တို့ဟာသရဲ ရှိ မရှိကို စမ်းသပ်ဖို့ အလုပ်များကြပါ တော့တယ်။ သူတို့တိုက်နံဘေးရှိ တရုတ်မြေစိုက်နတ်စင်ကနေ အမွှေးတိုင်ကြောင့်ကြွေကျထားတဲ့ ပြာမှုန့် တွေကို သွားယူကြပါတယ်။ နောက်ဖေးမီးဖိုချောင်မှာ Gas မီးဖိုကို အသုံးပြုတာကြောင့် အိမ်တွေမှာ ပြာမှုန့်

ရှာဖို့ခက်ခဲပါတယ်။ ဒါကြောင့် တရုတ်သတင်းစာတွေကို မီးရှို့ပြီး “ပြာ” ရအောင် လုပ်ရပါတယ်။ သူတို့စမ်း သပ်ဖို့ သဘောတူ ထားတဲ့နည်းလမ်းက ဒုတိယ နည်းလမ်းပါ။ ပထမ နည်းကို သဘောမတူကြပါဘူး။ ခေါ်လိုက်လို့ ၀င်လာရင်၊ ၀င်လာတဲ့ သရဲက သရဲထက်ကြီးသော “သဘက်” ဆိုရင် အန္တရာယ်ရှိမှာ စိုးလို့ပါ။

ည (၉)နာရီ ကျော်ကျော်လောက်မှာ သရဲခြောက်တဲ့ အမှိုက်ပစ်ရာလမ်းကြားဆီကို သူတို့ သွားကြပါတယ်။ “ခေါစာ” ပစ်မဲ့ လင်ဗန်းထဲမှာစားစရာတွေ အပြင် လွန်ခဲ့တဲ့ ညက ဆရာဝန်ဖြစ်သူရဲ့ အိမ်မက်ထဲကအတိုင်း ကလေးကစားစရာ အရုပ်ကားလေး တစ်စီးကိုပါ ထည့်ယူလာကြပါတယ်။ အမဲသား၊ ၀က်သားဟင်းတွေ၊ ခေါက်ဆွဲကြော်တွေနဲ့ ကလေးကစားစရာ မော်တော်ကားလေး တစ်ခု အပါအ၀င် လင်ဗန်းအလယ်မှာအမွှေး တိုင် သုံးချောင်းလောက်ကို မီးရှို့ ထိုးစိုက်ကြပါတယ်။ ဗလတောင့်တောင့် လူငယ်တစ်ဦးက “ခေါစာ” ပစ်တဲ့

အလုပ်ကို လုပ်ပါတယ်။သူက “ခေါစာ” ထည့်ထားတဲ့ လင်ဗန်းကိုလက်ပြန်ပုံစံနဲ့ချအပြီးမှာ ကျန်တဲ့သူတွေက အသင့်ယူဆောင်လာတဲ့“ပြာမှုန့်”တွေကို လင်ဗန်းကနေ သုံးပေလောက်ရှိတဲ့ အကွာအဝေးအထိ ခပ်ထူထူ လေး ခင်းကြပါတယ်။ ပြာမှုန့်တွေ ဘယ်သူမျှ မနင်းမိအောင် ဂရုတစိုက် ခင်းပြီးချိန်မှာ “ခေါစာ”ကျွေးသူက စလောင်းဖုံးကို ဟင်းမွေရာမှာ အသုံးပြုတဲ့ ယောင်းမနဲ့ သုံးချက်လောက်တီးပြီး ပါးစပ်ကလည်း “ဒီနေရာမှာ ရှိတဲ့၊ နေထိုင်နေတဲ့ မကျွတ်မလွတ်တဲ့ပုဂ္ဂိုလ်များရှိရင် လာရောက်ပြီး အားရပါးရ စားသုံးကြပါ …” လို့အသံ ခပ်အုပ်အုပ်နဲ့ သရဲခေါ်ပါတော့တယ်။

အဲဒီနောက် သူတို့အားလုံး ဆရာဝန်မိသားစု နေထိုင်ရာအခန်းပေါက်ဝဖက်ကို ပြန်လာခဲ့ကြပါတယ်။ နေထိုင် ရာ အခန်းပေါက်ဝကနေ အမှိုက်ပစ်ရာ လမ်းကြားထိပ်ကို လှမ်းကြည့်ရင် မြင်နေရပါတယ်။ ဒါကြောင့် သူတို့ တစ်အုပ်စုလုံး အိမ်ခန်းထဲ ပြန်မ၀င်ကြပဲ အခန်းပေါက်ကနေ လမ်းကြားထိပ်ကို မျက်ခြေမပျက် စောင့်ကြည့် တာပါ။

ဒီလိုနဲ့ တစ်အုပ်စုလုံး စကားပြောလိုက် အိမ်ထဲက မိသားစု ကျွေးမွေးတဲ့ မြန်မာပြည်က လာတဲ့ လ္ဘက်သုပ်  နဲ့ ရေနွေးကြမ်းတွေသောက်ရင်း စောင့်နေကြပါတယ်။ ည (၁၁)နာရီ ကျော်ကျော်လောက်မှာ လှေကားက နေ တစုံတယောက် ပြေးတက်လာတဲ့ခပ်ပြင်းပြင်းခြေသံတစ်ခုကို သူတို့ ကြားလိုက်ရပါတယ်။ ခြေသံဟာ လှေကားကနေ သူတို့အလွှာကိုကွေ့ဝင်လို့ရတဲ့ နေရာအရောက်မှာ လုံးဝ ရပ်သွားပြီး ရုတ်တရက် ဆိုသလို ကလေးငယ် တစ်ဦးဟာ “ခေါစာ” ပစ်ထားတဲ့ အမှိုက်သွားပြစ်ရာ လမ်းကြားထဲ ဆီ ပြေးဝင်သွားပါတယ်။ ပထမတော့ စောင့်ကြည့်နေသူ အားလုံးကြောင်တောင်တောင် ဖြစ်သွားပါတယ်။ သူတို့ထဲက တစ်ယောက်

က “ဒီကလေးက ဘယ်ကလဲ” လို့ ပြောလိုက်တော့မှ အားလုံးသတိဝင်လာပြီး လမ်းကြားလေးဆီ အပြေးအ လွှား သွားကြည့်ကြပါတော့တယ်။

အမှိုက်သွားပစ်တဲ့ လမ်းကြားထိပ်ကို ရောက်ဖို့ ဆယ်ပေကျော်ကျော်လောက်သာ အလိုမှာ လမ်းကြားထဲမှ တစုံတယောက်က အပြင်ကိုပစ္စည်းတစ်ခု လွှင့်ပြစ်လိုက်ပါတယ်။ လွှင့်ပြစ်ခံရတဲ့ ပစ္စည်းကို သူတို့အားလုံး ၀ိုင်းကြည့်လိုက်တော့ “ခေါစာ” ပြစ်ထားတဲ့ လင်ဗန်းထဲမှာသူတို့ထည့်ပေးထားတဲ့ ကလေးကစားစရာ မော် တော်ကားလေးပါ။လမ်းကြားထိပ်ကို ရောက်ရှိသွားပြီး လမ်းအတွင်းကို ကြည့်လိုက်တော့ဘယ်သူကိုမျှမတွေ့ ရပါ။ ခုနကကလေး ဘယ်ပျောက်သွားသလဲလို့ပဟေဠိဆန်ဆန်ဖြစ်နေချိန်မှာ သူတို့ထဲကတစ်ယောက်က

“ဒီမှာကြည့် ပြာတွေပေါ်မှာ ခြေရာတွေ အများကြီးပဲ”

“ခေါစာ” ဗန်းထဲကအစားအစားတွေလည်း တစ်ယောက်ယောက်စားသောက်ထားသလို ပုံပျက်နေပြီး နံဘေး မှာ ခင်းထားတဲ့ ပြာတွေပေါ်မှာလည်း ခြေရာ အသေးတွေရော အကြီးတွေရော ရှုပ်ရှက်ခတ်နေပါတယ်။ အဲဒီ အချိန်မှာ သူတို့ထဲက တစ်ယောက်က မျက်လုံးပြူးမျက်ဆန်ပြူးနဲ့ အမှိုက်ထုပ် ပစ်ချရာ အပေါက်ကို လက် ညှိုးထိုးပြီး “ဟိုမှာ …ဟိုမှာ” လို့ အော်ပါတော့တယ်။ ကျန်တဲ့သူတွေ ၀ိုင်းကြည့်ကြတော့ ဘယ်သူကိုမျှမတွေ့ ရပါဘူး။ ရုတ်တရက် သူတို့အားလုံးရဲ့ မျက်စိရှေ့က အမှိုက်ပစ်တဲ့ အပေါက်ဝရှိ အနံ့ပြန်မတက်အောင်

ဖုံးကားပေးတဲ့ သံပြားဖုံးဟာ သူ့အလိုလို ပွင့်ပြီး ပြန်ပိတ်သွားပါတယ်။

“ဟိုမှာ .. ဟိုမှာ”လို့ အော်နေတဲ့ လူငယ်လည်း အော်ရင်း တန်းလန်းနဲ့ လဲကျသွားပါတယ်။ တစ်အုပ်စုလုံး သတိမေ့သွားတဲ့ လူငယ်ကိုပွေ့ချီ ပြီး အခန်း ရှိရာဆီ အမြန်သယ်ဆောင်ရပါတော့တယ်။

ရုတ်ရုတ်သဲသဲ ဖြစ်သံတွေကြောင့် သူတို့နေထိုင်ရာအလွှာရှိ နံဘေးခန်းက လူတွေလည်း အပြင်ထွက်ကြည့် ကြပါတယ်။ သူတို့လည်းမသိချင်ယောင်ဆောင်ပြီး နေခဲ့ကြပါတယ်။ မိနစ်(၂၀) နီးပါး ၀ိုင်းပြုစုအပြီးမှာ သတိ လစ်သွားတဲ့ လူငယ်လည်း သတိပြန်ရလာပါတယ်။ အကြောက်လွန်နေသူရဲ့ ခန္ဓာကိုယ်ကို ဘုရားစင်က သောက်တော်ရေတွေစွန့်ပြီး ပက်ဖြန်းတဲ့သူက ဖြန်း၊ လည်ပင်းမှာ စိတ်ပုတီး ဆွဲပေးကြနဲ့ အလုပ်ရှုပ်ကြ ပါတော့တယ်။ သတိပြန်ရလာသူအား စိတ်ငြိမ်သွားရန် ဆရာဝန်က ဆေးတစ်လုံး တိုက်လိုက်ပါတယ်။

အခန်းပိုင်ရှင် မိသားစုက အမှိုက်ပြစ်ရာ လမ်းကြားတွင် သူတို့အုပ်စုခေါစာပစ်ခဲ့တဲ့ လင်ဗန်းနဲ့ပြာမှုန့်တွေ ကို မနက်ကြမှသန့်ရှင်းရေးလုပ်လိုက်မယ်လို့ပြောပါတယ်။ သူတို့ထဲကတချို့က အဲဒီနေရာကို နောက်တစ် ခေါက် သွားကြည့်ချင်ကြောင်း ပြောကြပါတယ်။ သူတို့တတွေအခန်းအပေါက်ဝကနေ အဲဒီလမ်းကြားလေး ထိပ်ဆီ ထွက်ကြည့်ကြပါတယ်။ တိုက်တစ်ခုလုံး တိတ်ဆိတ်နေပါပြီ။ ခုနက မီးပွင့်လာတဲ့ နံဘေး အခန်းတွေ လည်း မီးတွေပိတ်ပြီး ပြန်အိပ်သွားပုံ ရပါတယ်။ သူတို့နံဘေးအခန်းမှ အိမ်မြှောင်တစ်ကောင်ရဲ့ စူးစူးဝါးဝါး စုတ်ထိုးသံကြောင့်သူတို့အားလုံး လန့်သလိုလို ဖြစ်သွားကြပါတယ်။ လက်က နာရီကိုကြည့်လိုက်တော့ (၁)နာရီ ထိုးဖို့ မိနစ်အနည်းငယ် လိုပါသေးတယ်။

အခန်းအပေါက်ဝကနေ အမှိုက်ပြစ်ရာလမ်းကြားဆီကို သူတို့အားလုံးထပ်သွားကြဖို့ ချီတုံချတုံ ဖြစ်နေကြပါ တယ်။ သူတို့အားလုံး လမ်းကြားလေးဆီမှာ ဘာများ ဆက်ဖြစ်လာမလဲလို့ စိုက်ကြည့် နေကြပါတယ်။အခန်း အားလုံးဆီကနေ အိမ်မြှောင်တွေရဲ့ ဆက်တိုက်စုတ်ထိုးသံကြောင့်သူတို့ အရမ်းအံ့သြနေပါတယ်။ ရုတ်တရက် အမှိုက်ပစ်ရာလမ်းကြားထိပ်ရှိ မီးရောင်အောက်မှာ လူအရိပ်နှစ်ခုကိုတွေ့လိုက်ရပါတယ်။သူတို့ အားလုံး နည်းနည်း တွေးဝေသွားပါတယ်။ သူတို့ထဲက တစ်ယောက်က …

“ဖြစ်ချင်တာဖြစ် သွားကြည့်ကြရအောင်၊ အရမ်းကြီး ကြောက်မနေနဲ့”

ဒီလိုနဲ့ဲ့သူတို့အားလုံး ခပ်လန့်လန့်ဖြင့် လမ်းကြားထိပ်ကို အသွား ၊ မရောက်တရောက်လောက်မှာ မီးရောင် အောက်က အရိပ်နှစ်ခုဟာသူ့အလိုလိုပျောက်သွားပြန်ပါတယ်။ သူတို့ထဲက တချို့လည်း ဘောင်းဘီက ခါးပတ်တွေ ဆွဲဖြုတ်ပြီး တစ်ခုခုဖြစ်လာရင် ခါးပတ်နဲ့ရိုက်မယ့်ပုံစံ အသင့်ပြင်ထားပါတယ်။ အဲဒီအချိန်မှာ သူတို့ထဲကလူငယ်တစ်ဦးမှ …“ခုနက ဒီလမ်းထိပ်က ဟိုကလေးကစားစရာ လေးရော”

လမ်းထိပ်ကို ပထမ တခေါက်အလာမှာ အတွင်းကနေ လွှင့်ပစ်လိုက်တဲ့ကလေးကစားစရာ အရုပ်ကားလည်း မတွေရတော့ပါ။ လမ်းကြားရှေ့ကို အရောက်၊ အတွင်းကို ကြည့်လိုက်တော့ “ခေါစာ” ပစ်ထားတဲ့ လင်ဗန်း လည်း မရှိတော့ပါ၊ အမှိုက်ပစ်တဲ့ အပေါက်ဝအောက်မှာကစားစရာ အရုပ်ကားလေး ရောက်နေတာကို တွေ့ ရပါတယ်။ ပြာမှုန့်တွေလည်း ပြန့်ကြဲနေပြီး နင်းပြီးလျှောက်ထားသလို လူခြေရာ ပုံစံအများအပြားကို တွေ့ လိုက်ရပါတယ်။ လေး …. ငါးမိနစ်လောက်ဟိုကြည့် ဒီကြည့်အပြီးမှာ သူတို့အားလုံး အခန်းရှိရာဆီ လှည့်ပြန်

ခဲ့ပါတယ်။ အိမ်ခန်းသို့ရောက်လုဆဲဆဲမှာ အနောက်ဖက်မှ “တောက်”ခေါက်သံ တစ်ခုကို ပီပီသသ ကြား လိုက်ရပါတယ်။ လှည့်ကြည့်လိုက်တော့ ဘာမျှ မတွေ့ရပါ။ သူတို့အားလုံး အခန်းအတွင်းကို ၀င်ကြတော့ မယ့် ဆဲဆဲမှာ လူတစ်ဦးရဲ့ ငိုရှိုက်သံလိုလို အသံ သဲ့သဲ့တချို့ကို ကြားလိုက်ရပါတယ်။ နောက်တခေါက် သွားကြည့်ဖို့ သူတို့မရဲတော့ပါ။

အလည်ရောက်နေသူတွေနဲ့ စကားတပြောပြောဖြင့် အိမ်ရှင်ဆရာဝန်ပါ ဧည့်ခန်းထဲမှာ အိပ်ပျော်သွားပါ တယ်။ အိမ်ရှင်ဖြစ်သူဟာ အိမ်မက်မက်နေသလိုလို အပြင်တွင် တကယ်ခံစားနေရသလိုလို အိမ်မက်တစ်ခု

ကို မက်ခဲ့ပါတယ် …

ဆရာဝန်၊ ငယ်သူငယ်ချင်းဖြစ်သူနဲ့ “ခေါစာ” ပြစ်ခဲ့တဲ့ ဗလတောင့်တောင့်လူငယ် သုံးဦးတို့ဟာ သူတို့ အိမ်ခန်း ထဲမှာ ထိုင်ပြီး စကားပြောနေကြပါတယ်။ အဲဒီအချိန်မှာ အပြင်က ဧည့်ခေါ် ခေါင်းလောင်းတီးသံ ကြားရပါတယ်။ တံခါးကို သွားဖွင့်ကြည့်တော့ အသက်လေးဆယ်ကျော်အရွယ် လူကြီးတစ်ဦးနဲ့ အသက် ရှစ်နှစ် … ကိုးနှစ်အရွယ် ကလေးငယ်တို့ကို တွေ့ရပါတယ်။ သူတို့က နံဘေးအခန်းမှာ နေသူများ ဖြစ် ကြောင်း၊ပြောပြစရာ ရှိတယ်လို့ ပြောဆိုပြီး သူတို့နေထိုင်ရာ ကပ်လျှက် အခန်းထဲသို့ ခေါ်ဆောင်သွားပါ တယ်။ အခန်းထဲ ရောက်ရောက်ချင်းမှာပဲကလေးငယ်က သူတို့သုံးဦးကို အခန်းအတွင်းထဲရှိ ရေချိုခန်းကို

လက်ညှိုး ထိုးပြပါတယ်။ ရေချိုးခန်းအတွင်းကို ရောက်တော့ အိမ်သာအပေါ်ရှိ ရေဆွဲချရာ ရေပုံးထဲကိုပစ္စည်း တစ်ခုခု နှိုက်ယူပေးဖို့ လက်ဟန်ခြေဟန်နဲ့ ပြပါတယ်။ ရေဆွဲချရာ ပုံးထဲကို နှိုက်ကြည့်လိုက်တော့ ပလပ် စတစ်နဲ့သေသေချာချာ ထုတ်ပိုးထားတဲ့ ကလေးကစားစရာ အရုပ်ကားလေးတစ်ခုကို တွေ့ရပါတယ်။ အဲဒီနောက် ကလေးငယ်က အုတ်နံရံဖက်ကို လက်ညှိုးထိုးပြလိုက်ပါတယ်။ အုတ်နံရံဟာ တီဗွီမျက်နှာပြင် တစ်ခုလိုဖြစ်လာပြီး သင်္ချိုင်းတစ်ခုကိုမြင်နေရပါတယ်။ သင်္ချိုင်းထဲရှိ လမ်းအကွေ့အကောက်အတော်များများ ကို ဖြတ်ကျော်အပြီးမှာ အုတ်ဂူတစ်ခုကို တွေ့ရပါတယ်။ ကလေးငယ်က ရေပုံးထဲမှာ ရရှိလာတဲ့ အရုပ်ကား လေးကို အဲဒီအုတ်ဂူပေါ်မှာ ထားပေးဖို့ ပြသပါတယ်။ အဲဒီနောက် ရုတ်တရက်ဆိုသလို နံရံပေါ်က မြင်ကွင်း ရော ကလေးငယ်ပါပျောက်ကွယ်သွားပါတယ်။

အဲဒီချိန်မှာ သူတို့သုံးဦးကို အခန်းအတွင်းသို့ ခေါ်ဆောင်လာတဲ့ လူကြီးဖြစ်သူက စကားပြောဖို့ ဧည့်ခန်း အတွင်း ကို ခေါ်ဆောင်သွားပါတယ်။ သူဟာ လွန်ခဲ့တဲ့ (၁၅)နှစ် နီးပါးက ဒီတိုက်မှာအလုပ်လုပ်ရင်း နေထိုင် တဲ့ မြန်မာပြည်သား တစ်ဦးဖြစ်ကြောင်း၊အလုပ်လုပ်တဲ့ နေရာကနေ ကလေးကစားစရာ ပစ္စည်းတစ်ခုကိုယူ ဆောင်လာမိကြောင်း၊ တနေ့တော့ အခန်းထဲမှာ သောက်ရင်းစားရင်းကနေ မူးပြီး သူအိပ်ပျော်သွားကြောင်း၊ အဲဒီနောက် သူသတိလစ်သလို ဖြစ်သွားကြောင်း၊ သူ့ခန္ဓာကိုယ်ဟာ တစုံတယောက်ရဲ့ ၀င်ရောက်ပူးကပ် ခြင်းကို ခံရပြီး အခန်းဖော်တွေနဲ့ အချင်းများခဲ့ကြောင်း၊ နောက်ဆုံးမှာ သူ့အခန်းဖော် သူငယ်ချင်း အလုပ် သမားများက သူ့ကို ရက်စက်စွာ သတ်ပြစ်ခဲ့ကြောင်း၊ သူ သေဆုံးပြီးတစ်နှစ်ကျော်တဲ့ အချိန်မှာ မြန်မာပြည် ရှိ ကျန်ရစ်သူ သူ့မိသားစုက ဘာသာရေးဆိုင်ရာ အမျှအတန်း ပေးဝေခဲ့ကြောင်း၊ သူ သေဆုံးတဲ့ ဒီနေရာမှာ ယနေ့အချိန်အထိ ဘာသာရေးဆိုင်ရာ ဆောင်ရွက်မူများ လုံးဝ မလုပ်ရသေးကြောင်း၊ မြန်မာပြည်တွင် ကျန် ရစ်ခဲ့သောသူ့သားသမီးများအနက် အကြီးဆုံးဖြစ်သူ သူ့သားလေးမှာ ယခုအခါပင်ပင်ပန်းပန်း ဆင်းဆင်းရဲရဲ ဖြင့် မိသားစုအား လုပ်ကျွေးနေရကြောင်း၊သူ့အတွက် အမျှအတန်းပေးဝေဖို့နဲ့ သူ့သားအကြီးဆုံးလေးကို

ဒီနိုင်ငံမှာ တရားဝင်အလုပ်သမားအဖြင့် အလုပ် လုပ်ခွင့်ရဖို့ကူညီပေးစေလိုကြောင်း ပြောပါတယ်။ မြန်မာပြည်ရှိ သူ့မိသားစုထံ ဆက်သွယ်ဖို့ ဖုန်းနံပါတ် တစ်ခုကိုလည်း ပေးပါတယ်။ အဲဒီနောက် သူလည်း ပျောက်ကွယ်သွားပါတော့တယ်။

…… …… …

မနက်စောစောစီးစီး ဧည့်သည်တွေထဲမှ ငယ်သူငယ်ချင်းဖြစ်သူနဲ့“ခေါစာ” ပစ်ခဲ့တဲ့ လူငယ်တို့ နှစ်ဦး ညက အိမ်မက်ဆိုးများ မက်ကြောင်းအိမ်ရှင် ဆရာဝန်ကို ပြောပြပါတယ်။ ဒီလိုနဲ့ နောက် (၂) ရက်ခန့်အကြာမှာ ဆရာဝန်ဖြစ်သူဟာ အလုပ်ထဲကနေ အိမ်ကို ပြန်လာခဲ့ပါတယ်။အိမ်ရှေ့ သံတံခါးကို ဖွင့်အ၀င်မှာ သူ့နားထဲ မှာ နံဘေးကနေ တစုံတယောက် တိုးတိုးလေး ကပ်ပြောသလို ခံစားလိုက်ရပါတယ်။ သူ့ကိုပြောသွားတဲ့ စကားသံက … “ညီလေး၊ မင်း ထီထိုးထားတာ … တိုက်ပြီးပြီလား …”

ရုတ်တရက် သူကြောင်သွားပါတယ်၊ နံဘေးကို ကြည့်လိုက်တော့လည်းသူ့နံဘေး ပတ်ဝန်းကျင်မှာ ဘယ်သူ ကိုမျှ မတွေ့ရပါ။ ဒါနဲ့ သူလည်းထီထိုးခဲ့တာကို သတိရသွားပြီး တိုက်အောက်ထပ်ကို ပြန်ဆင်းခဲ့ပါတယ်။

တိုက်နံဘေးက အိန္ဒိယကုန်စုံဆိုင်အရှေ့ရှိ သတင်းစာအပုံမှာ သူ ထိုးထားတဲ့ ထီနံပါတ်ကို ရှာဖွေလိုက်ပါ တယ်။ သူ အရမ်းအံ့သြ သွားပါတယ်။သူ့ သူငယ်ချင်း ရယ်စရာအဖြစ် ပြောခဲ့တဲ့၊ သူ့အိမ်မက်ထဲမှာ သရဲ

ပေးခဲ့တဲ့ တယ်လီဖုန်းနံပါတ်ရဲ့ နောက်ဆုံးဂဏန်းလေးလုံးဟာ ထီရဲ့ဒုတိယဆုနေရာမှာ တွေ့လိုက်ရလို့ပါ။ ထီထိုးထားပေမဲ့ ထီပေါက်ဖို့လုံးဝ မမျှော်လင့်ထားတဲ့ သူ့အဖြစ်ဟာ သူ့ကိုယ်သူ မယုံသလိုနဲ့ သတင်းစာ ပေါ်က နံပါတ်ကို ကြည့်လိုက် လက်ထဲမှာ ထိုးထားတဲ့ထီစာရွက်ကို ကြည့်လိုက်နဲ့ ဂနာမငြိမ်ဖြစ်နေပါတယ်။

အိမ်ရှင်ဆရာဝန်ဖြစ်သူဟာ သူ့မိသားစုကို ထီပေါက်ခဲ့တဲ့ အကြောင်းစုံကို ပြောပြလိုက်ပါတယ်။သူ့ဇနီးသည် နဲ့ မိခင်ဖြစ်သူတို့က ကွယ်လွန်သွားသူအတွက် ဆွမ်းသွတ်အမျှ ပေးဝေဖို့၊ အိမ်မက်ထဲမှာ ပေးခဲ့တဲ့ဖုန်း နံပါတ်ကို ဆက်သွယ်ကြည့်ဖို့ တိုက်တွန်းကြပါတယ်။ မယုံတ၀က်ယုံတ၀က်နဲ့ အိမ်မက်ထဲက ဖုန်းနံပါတ်ကို သူ ဆက်သွယ်လိုက်ပါတယ်။မြန်မာပြည်က တယ်လီဖုန်းပိုင်ရှင်မိသားစုရဲ့ အကူအညီပေးမှုကြောင့်ကျန်ရစ် သူ မိသားစုနဲ့သူ အဆက်အသွယ် ရခဲ့ပါတယ်။ သူဟာ လွန်ခဲ့တဲ့ (၁၅)နှစ်လောက်က ဒီတိုင်းပြည်မှာအလုပ် လာလုပ်ရင်း ကွယ်လွန်ခဲ့သူနဲ့ ခင်မင်ရင်းနှီးသူ တစ်ဦးဖြစ်ကြောင်း၊ ကျန်ရစ်သူမိသားစုကို အကူအညီပေး ချင်ကြောင်း ရှင်းပြလိုက်ပါတယ်။ နောက်ရက်တွေမှာသူ ထီပေါက်လို့ ရခဲ့တဲ့ ငွေတွေထဲက မြန်မာငွေ (၁၀) သိန်း တန်ဖိုးကိုလွှဲပို့ပေးလိုက်သလို ကွယ်လွန်သူရဲ့ သားအကြီးဆုံးဖြစ်သူကိုလည်းဒီတိုင်းပြည်မှာ တရားဝင် အလုပ်သမားအဖြစ် လာရောက်နိုင်အောင်အစစ အရာရာ အကုန်အကျခံ ကူညီမယ်ဖို့ကတိပေး လိုက်ပါ တယ်။

အဲဒီရက်တွေနောက်ပိုင်းမှာ ဆရာဝန်ဖြစ်သူဟာ သူ့အခန်းနဲ့ကပ်လျှက်အခန်းက အခန်းပိုင်ရှင်တွေကိုလိုက် လံ စုံစမ်းခဲ့ပါတယ်။အခန်းပိုင်ရှင် တရုတ်အဖွားကြီးဟာ အဲဒီအခန်းမှာ တခါတရံသာ လာနေလေ့ရှိကြောင်း နံဘေးခန်းတွေက ပြောပြကြပါတယ်။ဒါနဲ့ အခန်းပိုင်ရှင် တရုတ်အဖွားအို ရှိရာဆီ သူ ရောက်ခဲ့ပါတယ်။

တရုတ်အဖွားအိုက ဆရာဝန်မိသားစုအခန်းနံဘေးရှိ သူ့အခန်းဟာ နိုင်ငံခြားမှာ ရောက်ရှိနေတဲ့ သူ့သမီးနဲ့ သမက်တို့ ပိုင်ဆိုင်တဲ့ အခန်းဖြစ်ကြောင်း၊ လွန်ခဲ့တဲ့ (၁၅)နှစ်ပတ်ဝန်းကျင်က သူ့တို့မိတ်ဆွေ တရုတ်လူမျိုး တစ်ဦးက သူ့ အလုပ်သမားများ နေထိုင်ရန် ငှားရမ်းခဲ့ဖူးကြောင်း၊ အဲဒီနောက်တော့ အိမ်ငှားတွေ ခဏခဏ

ပြောင်းရွှေ့ကြကြောင်း၊ ဒါနဲ့ နောက်ပိုင်းမှာ ဘယ်သူကိုမျှမငှားတော့ပဲသူနေထိုင်ခဲ့ကြောင်း၊ ယခင်က ဘာမျှ မဖြစ်ခဲ့တဲ့ သူ့အခန်းဟာညဖက်တွေမှာ သရဲခြောက်သလို ထူးထူးဆန်းဆန်းတွေ ဖြစ်ကြောင်း၊ဒါကြောင့်လဲ ဘယ်သူ ကိုမျှ ထပ်မငှားတော့ပဲ တခါတရံ နေ့လည်ပိုင်းတွေမှာ သူ အလည်လာပြီး နေခဲ့ကြောင်း၊ညဖက်မှာ မအိပ်ရဲတာကြောင့် ယခုအခါ သူတို့ပိုင်ဆိုင်တဲ့ ပစ္စည်းအဟောင်းများသာထားရှိသော စတိုးခန်းအဖြစ်အသုံး ပြုကြောင်း ရှင်းပြပါတယ်။

ဆရာဝန်ဖြစ်သူက တရုတ်အဖွားအိုအား လွန်ခဲ့သော (၁၅)နှစ်ခန့်ကအဲဒီအခန်းမှာ သူ့သူငယ်ချင်း အလုပ် သမား တစ်စု နေထိုင်ခဲ့ဖူးကြောင်း၊သူတို့ထဲက တစ်ယောက်ဟာ အရက် အလွန်သောက်သောကြောင့်

လုပ်ငန်းခွင်ထဲမှာ ကွယ်လွန်ခဲ့ကြောင်း၊ ကွယ်လွန်သူ ပိုင်ဆိုင်ခဲ့တဲ့ပစ္စည်းတစ်ခုဟာ အဲဒီအခန်းထဲမှာ ကျန် ရစ်ခဲ့ကြောင်း၊ သူ ဒီတိုက်ကိုပြောင်းရွှေ့လာပြီး မကြာခဏဆိုသလို ကွယ်လွန်သူက အိမ်မက်ပေးကြောင်း၊ ဒါကြောင့် အဲဒီအခန်းထဲမှာ ကွယ်လွန်သူအတွက် ရည်စူးပြီး ဘာသာရေးဆိုင်ရာ ဆုတောင်းမေတ္တာပို့တဲ့ ပွဲတစ်ခု လုပ်ချင်ကြောင်း ခွင့်တောင်းခံပါတယ်။ အခန်းပိုင်ရှင် အဖွားအိုကလည်း ကြည်ကြည်ဖြူဖြူ ခွင့်ပြုခဲ့ ပါတယ်။

စနေ၊တနင်္ဂနွေ ရုံးပိတ်ရက်တစ်ခုမှာ ဆရာဝန်မိသားစုနဲ့သူငယ်ချင်း မိတ်ဆွေများဟာ အဲဒီတိုင်းပြည်ကို ကြွ ရောက်နေတဲ့ မြန်မာဘုန်းတော်ကြီးတစ်ပါးကို ပင့်ဖိတ်ခဲ့ကြပါတယ်။တရုတ်မိသားစုပိုင်ဆိုင်ရာ အခန်းအတွင်း ကွယ်လွန်သူအတွက် ရည်စူးပြီး ဆုတောင်းမေတ္တာပို့သလို သရဲခြောက်တယ်လို့ နာမည်ကြီးနေတဲ့ အမှိုက် သွားပစ်ရာ လမ်းကြားဆီမှာလည်း ပရိတ်တရား နာယူခဲ့ကြပါတယ်။တရားပွဲအပြီး ဆရာဝန်နဲ့ သရဲခြောက် မခြောက်ကို စမ်းသပ်ခဲ့တဲ့ငယ်သူငယ်ချင်းတို့ဟာ အဲဒီအခန်းထဲရှိ အိမ်သာအပေါ်မှ ရေဆွဲချရာ ရေပုံးထဲကို ရှာဖွေခဲ့ကြပါတယ်။ ရေပုံးအတွင်းက ပလပ်စတစ်နဲ့သေသေချာချာ ထုပ်ပိုးထားတဲ့ ကလေးကစားစရာအရုပ် ကားလေးတစ်စီးကို တွေ့ရှိပြီးတဲ့နောက်ပိုင်း သရဲတစ္ဆေ မယုံကြည်တဲ့ ဆရာဝန်ဟာ သူ့အယူအဆကို စွန့်လွှတ်လိုက်ပါတော့တယ်။

သူတို့နှစ်ဦးဟာ အရုပ်ကားလေးကို တရုတ်သင်္ချိုင်း တစ်ခုခုမှာ သွားထားပြစ်ဖို့ စိတ်ကူးကြပါတယ်။ ဒီလိုနဲ့ အငှားကားတစ်စီးကို ငှားပြီး တရုတ်သင်္ချိုင်းတစ်ခုသို့ သွားရောက်ချင်ကြောင်း ကားသမားကို ပြောပါတယ်။ ကားသမားက ဘယ်သင်္ချိုင်းလဲလို့မေးတော့ သူတို့နှစ်ဦးလည်း တရုတ်သင်္ချိုင်းဖြစ်ရင် ပြီးရောလို့ ပြန်ဖြေခဲ့ ပါတယ်။ ဒီလိုနဲ့သူတို့နှစ်ဦး အငှားကားရဲ့ နောက်ခန်းကနေ လိုက်ပါခဲ့ကြပါတယ်။ကားသမားက ရှေ့ခန်းမှာ ကားမောင်းနေရင်း တရုတ်လို ပြောနေပါတယ်။ သူတို့ကတော့ ကားသမား အငှားကားဌာနနဲ့ တရုတ်လို

ပြောနေတယ်လို့ပဲ ယူဆနေကြပါတယ်။ကားက နာရီဝက်နီးပါးကြာအောင် မောင်းနေချိန်မှာ သူတို့စိတ်ထဲ ဒီကားသမား ပိုက်ဆံပိုလိုချင်လို့ လှည့်ပတ်မောင်းနေတယ်ထင်မိပါတယ်။ဒါကြောင့်ကားသမားကိုဘယ်တော့ ရောက်မလဲလို့မေးလိုက်တော့ ကားသမားက ခင်ဗျားတို့သွားချင်တဲ့နေရာကို မကြာခင် ရောက်တော့မှာပါ လို့ပြန်ဖြေပြီး တစ်ယောက်တည်း တရုတ်လို ဆက်ပြောနေပါတယ်။ဒီလိုနဲ့ တရုတ်သင်္ချိုင်းကုန်းတစ်ခုရဲ့ ရှေ့ မှာ ကားသမားက ကားကိုရပ်ပေးလိုက်ပါတယ်။

သူတို့နှစ်ဦးလည်း တရုတ်သင်္ချိုင်းဝန်းထဲကို ရောက်ပြီး ဟိုအုတ်ဂူပေါ်တင်ခဲ့ရင် ကောင်းနိုးနိုး ဒီအုတ်ဂူပေါ်မှာ ထားခဲ့ရင် ကောင်းနိုးနိုးနဲ့သင်္ချိုင်းအလယ်က လမ်းမကြီးအတိုင်း ၀င်ခဲ့ကြပါတယ်။ ရုတ်တရက် သင်္ချိုင်းလမ်းမ ကြီးရဲ့ တစ်နေရာကနေ လေချွန်သံကိုကြားလိုက်ရပါတယ်။ ကြည့်လိုက်တော့ ကလေးငယ်တစ်ဦးက သူတို့ ကို လက်ယက်ပြီး ခေါ်နေပါတယ်။ ဒါနဲ့ကလေးငယ်ရှိရာဆီ သူတို့ သွားကြပါတယ်။ ကလေးငယ်ရဲ့ နံဘေး နားကို မရောက်သေးခင် သူတို့ရဲ့ မျက်စိရှေ့မှာပဲ ကလေးငယ်ဟာ ပျောက်ချင်းမလှ ပျောက်သွားပါတယ်။ လှမ်းခေါ်ခဲ့တဲ့ နေရာဆီကို ရောက်အောင်သွားကြည့်လိုက်တော့ သူတို့ အရမ်းထိန်လန့်သွားပါတယ်။ အုတ်ဂူလေး တစ်ခုပါ။ အဲဒီအပေါ်မှာ သူတို့“ခေါစာ” ပစ်ခဲ့တဲ့ လင်ဗန်းကို တွေ့လိုက်ရပါတယ်။ သူတို့နှစ်ဦး လည်းယူဆောင်လာတဲ့ ကစားစရာအရုပ်ကားလေးကို အုတ်ဂူပေါ်မှာတင်ပြီး ခပ်သုတ်သုတ် ထွက်ခွာခဲ့ကြပါ တယ်။

တရုတ်သင်္ချိုင်းအပေါက်ဝကို ပြန်ထွက်လာတော့ အလာမှာ ငှားစီးခဲ့တဲ့ Taxi ကားနဲ့ ကားမောင်းသူကို တွေ့ ရတာ ကြောင့် ကားငှားချင်ကြောင်းပြောပြီး ကားပေါ်သို့ တက်လိုက်ပါတယ်။ ကားပေါ်မှာတော်တော်ကြာတဲ့ အချိန်အထိ ကားမမောင်းတာကြောင့် ကားသမားကို ဘာဖြစ်လို့ မမောင်းသလဲဆိုပြီး မေးကြည့်လိုက်တော့ ကားသမားက “ဒီသင်္ချိုင်းဆီကိုအလာမှာ ခင်ဗျားတို့နဲ့ အတူတူပါလာတဲ့ တရုပ်ကောင်လေးရော ပြန်မလိုက် တော့ဘူးလား….”သူတို့နှစ်ဦး ကားတံခါးဖွင့်ပြီး ကားပေါ်ကနေ မပြေးရုံတမယ် ပြန်ဆင်းတော့မလို ဖြစ်သွားပြီးမှ….“သူ ပြန်မလိုက်တော့ဘူး… လာခဲ့တဲ့နေရာကို အမြန်ဆုံး မောင်းပါ”


 (စာရေးသူ- စစ်ငြိမ်းဒီရေ) 
 ကိုအောင်(ပျူနိုင်ငံ) စာမျက်နှာ www.pyustat.comမှထပ်ဆင့်ကူးယူဖေါ်ပြသည်။